Փսորիազ. ճիշտ սնուցում և սննդակարգ. izmirlianmedicalcenter.com

Ճիշտ սնուցման շնորհիվ փսորիազով տառապող մարդը կարող է զգալիորեն ազդել հիվանդության ծանրության աստիճանի և ախտանիշների վրա: Փսորիազի ժամանակ ճիշտ սնուցման նպատակն օրգանիզմում որոշակի թթվահիմնային հավասարակշռություն ապահովելն է: Ամբողջ աշխարհում փսորիազի բուժման ժամանակ ավելի քան 20 տարի կիրառվում է ամերիկացի բժիշկ Ջոն Պեգանոյի կողմից մշակված սննդակարգը: Ըստ բժիշկ Պեգանոյի, ինչպես մաշկի այլ հիվանդությունների, այնպես էլ փսորիազի աղբյուրը գտնվում է աղտոտված աղիներում: Արտազատիչ համակարգի վատ աշխատանքի ֆոնին մաշկն իր վրա է վերցնում օրգանիզմից շլակները դուրս բերելու հիմնական բեռը: Բալանսավորված սննդակարգը նպաստում է աղիների գործունեության կարգավորմանը՝ դրանով բարելավելով մաշկի վիճակը:

Փսորիազով տառապող մարդու ամենօրյա սննդակարգը պետք է 70-80%-ով բաղկացած լինի հիմքեր առաջացնող մթերքներից և 20-30%-ով` թթուներ առաջացնող մթերքներից:

Հիմք առաջացնող մթերքներ

Մրգեր (բացի լոռամրգից, հաղարջից, սալորից, սալորաչրից, հապալասից): Խնձորը, բանանը, սեխը կարելի է միայն առանձին ուտել՝ առանց այլ մթերքների հետ համակցելու:  Ցիտրուսային մրգերը (այդ թվում հյութերը) չի կարելի համակցել ամբողջական հացահատկից պատրաստված մթերքի և կաթնամթերքի հետ:

Բանջարեղեն (բացառությամբ լոբազգիների, խավարածիլի, դդմի, բրուսելյան կաղամբի. դրանք կարելի է ուտել ոչ մեծ քանակությամբ): Մորմազգիների ընտանիքի բանջարեղենը (կարտոֆիլ, լոլիկ, սմբուկ, պղպեղ) պետք է ամբողջությամբ բացառել սննդակարգից:

Օրգանիզմում հիմնայնությունն ավելացնում են նաև.

• սննդի և ըմպելիքի մեջ լեցիտինի ավելացումը,
• մեկ բաժակ ջրի մեջ թարմ քամած կիտրոնի հյութի ավելացումը,
• խաղողի, ծիրանի, տանձի, անանասի, թուրնջի, նարնջի հյութեր , ինչպես նաև մանգոյի և պապայայի հյութեր,
• բանջարեղենային հյութեր,
• մեկ բաժակ մաքուր ջրի մեջ 3-5 կաթիլ գլիկոթիմոլինի ավելացում (կիրառել շաբաթը հինգ օր՝ քնելուց առաջ): Հիմնային հանքային ջրեր «Բորժոմի» , «Եսենտուկի-4» և այլն:

Թթուներ առաջացնող մթերքներ.

• միս և մսամթերք,
• հատիկավորներ,
• պանիր,
• շաքար,
• կարտոֆիլ, չորացրած սիսեռ և լոբազգիներ,
• կարագ, սերուցք:

Մեծ քանակությամբ այս մթերքների համակցումն արյան մեջ թթվային ռեակցիա է առաջացնում՝ վատթարացնելով հիվանդության ընթացքը:

Փսորիազով հիվանդներին խորհուրդ է տրվում բացառել.

• սննդի մեկ ընդունման ժամանակ հիմք առաջացնող մի քանի մթերքների համակցում,
• շաքար և շաքար պարունակող մթերքներ,
• կոնսերվանտներ, ներկանյութեր, արհեստական հավելումներ պարունակող մթերքներ ,
• քացախի տեսակների մեծ մասը,
• ալկոհոլային ըմպելիքներ:

Վատ բալանսավորված սննդակարգը կարող է չորացնել աչքերը: Ամերիկացի գիտնականները եկել են այն եզրակացության, որ կանանց մոտ «չոր աչքերի» տհաճ համախտանիշի զարգացման վրա ազդում է սննդակարգում որոշակի ճարպաթթուների հարաբերակցությունը, օրինակ, սննդակարգում մեծ քանակությամբ կենդանական ճարպի կիրառումը:

Մթերքների արգելված համակցումներ

• շիլաները, հացը, ամբողջական հացահատիկից պատրաստված մթերքները ցիտրուսային, ինչպես նաև շոգեխաշած կամ չորացրած մրգերի հետ:
• ցիտրուսները և նրանց հյութերը կաթնամթերքի հետ,
• սուրճը և թեյը` շաքարով, կաթով կամ սերուցքով,
• մեկ ուտեստում չափազանց շատ թթու առաջացնող մթերքներ:

Փսորիազով տառապող մարդու սննդակարգը ինչ մթերքներից էլ բաղկացած լինի, ամեն դեպքում, չի կարելի շատ ուտել: Սննդակարգի բոլոր կետերին խիստ հետևելու դեպքում միայն բուժումը կարող է շոշափելի արդյունքներ տալ:

Քանի որ փսորիազով մարդկանց մոտ խանգարված է նյութափոխանակությունը, վերը նշված սննդակարգին պետք է հետևել բուժող բժշկի մոտ նախնական խորհրդատվությունից հետո:

Հարցեր, պատասխաններ, մեկնաբանություններ